BCAREk sare elektrikoen aldeko apustua indartu du BATCTrekin, Iberdrolaren Global Smart Grids Innovation Hub ekosisteman garatutako produktuarekin

BCAREk sare elektrikoen arloko jarduera indartu du BATCTrekin. 48 V DC-ko litiozko bateria hori transformazio-zentroetarako garatu da, eta AENORek, adostasunaren ebaluazioan espezializatutako erakundeak, emandako “Producto desarrollado en el GSGIH – IBERDROLA” zigilua du.

Transformazio-zentroak funtsezko instalazioak dira sare elektrikoan: elektrizitatearen tentsioa egokitzen dute, kontsumo-puntuetara behar bezala banatu ahal izateko. Haien funtzionamendua bermatzeko, gainera, babes-, kontrol- eta telekomunikazio-sistemak dituzte, instalazioa gainbegiratzeko eta izan daitezkeen gorabeheren aurrean jarduteko.

BATCT sistema horiei ordezko elikadura elektrikoa emateko garatu da, hain zuzen ere. Hornidura elektrikoa eteten bada, bateriak babes-, kontrol- eta telekomunikazio-sistemek martxan jarraitzeko behar duten energia ematen du. Horretarako, BCAREk instalazio horien eskakizunetara bereziki egokitutako 48 V DC-ko soluzioa diseinatu du.

Produktua Global Smart Grids Innovation Hub (GSGIH) ekosistemaren barruan garatu da. Ekosistema hori i-DE Iberdrola taldeko elektrizitate-banatzaileak eta Bizkaiko Foru Aldundiak sustatzen dute. Hubak enpresak, zentro teknologikoak eta erakundeak biltzen ditu, sare elektriko adimendunen bilakaeran lagunduko duten soluzio berriak garatu eta probatzeko. Ehun erakunde baino gehiagok parte hartzen dute bertan.

Testuinguru horretan, i-DEk sustatutako zigiluak Hubaren barruan prestatutako zehaztapen tekniko baten arabera garatutako produktuak identifikatzen ditu. BCARE ekosistema horretan erakunde laguntzaile gisa aritzen da, eta BATCTren hornitzaile kualifikatua da. Energia-biltegiratzean, elektronikan eta ingeniaritzan dituen gaitasunak bateratzen ditu, sarearen behar zehatzei erantzuteko lankidetza-eredu batean.

“BATCTk ondo erakusten du baterien arloan dugun ezagutza sare elektrikoaren aplikazio oso zehatz batera nola eraman dezakegun. Eskakizun tekniko jakin batzuei erantzuteko gure soluzio propioa garatu dugu, eta Global Smart Grids Innovation Hub bezalako lankidetza-ingurune batean lan egiteak sektorearen benetako beharretatik gertu egoteko eta beste eragile espezializatu batzuekin gaitasunak batzeko aukera ematen digu”, adierazi du Ramón Ugartek, BCAREko zuzendari nagusiak.

Lan honek jarraipena ematen dio BCAREk Iberdrolaren sare elektrikoen ekosistemarekin duen lankidetzari. 2024an, konpainiak Iberdrolaren Urteko Hornitzailearen Saria jaso zuen, Trantsizio Energetikoaren kategorian. Aitorpen horretan, eskatutako prototipoak entregatzeko erakutsitako prestasuna, erantzuteko gaitasuna eta konpromisoak betetzea nabarmendu ziren.

BATCT beste urrats bat da BCAREren sare elektrikoei lotutako jardueran, baita teknologia-produktu propioak garatzeko bilakaeran ere. CIC energiGUNEren spin-off gisa, konpainiak energia-biltegiratzearen arloko ezagutza espezializatua du abiapuntu, eta elektronikan, softwarean, ingeniaritzan eta sistemen integrazioan dituen gaitasunekin uztartzen du, industria-aplikazio zehatzetarako soluzioak garatzeko.

BATCTren kasuan, gaitasun horiek sare elektrikoaren eguneroko funtzionamendurako funtsezkoa den azpiegitura batean aplikatzen dira. Horrela, transformazio-zentroen ordezko elikaduraren beharrei erantzuteko pentsatutako produktu propio bat sortu da.