Bcare, ezagutza bikainaren eta merkatuaren arteko lotunea

CCIC energiGUNEk Go Mobility azokan aurkeztuko du baterien eta kondentsadoreen osasun-egoera diagnostikatzeko eta iragartzeko bere spin-off berria. Izan ere, Go Mobility ingurune pribilegiatua da zerbitzu teknologiko aurreratuak jendaurrean aurkezteko. Zerbitzu horiek garraioaren eraginkortasun energetikoa hobetuko dute eta euskal industria-sarean beste aukera eta aurrerapen batzuk bultzatu nahi dituzte.

Bcare baterien eta kondentsadoreen osasun-egoera diagnostikatzeko eta iragartzeko balio erantsiko zerbitzuen spin-off berri bat da. Spin-off horrek enpresen aholkulari tekniko eta integrala izan nahi du baterien osasun-egoerari dagokionez. Laguntza-zerbitzua eskainiko du, eta baterien etapa guztiak hartuko ditu barnean, sortzen direnetik bizitza baliagarria bukatzen zaien arte. Zerbitzu hauek eskainiko ditu:

• Analisia eta laguntza, kimikako ezagutzan oinarrituak, baterien teknologia komertzialak hautatzeko.
• Baterien portaera iragartzeko diagnostikoa.
• Analisia, diagnostikoa eta aholkularitza, erabiltzen diren baterien bizi-itxaropena eta errendimendua hobetzeko.
• Auditoretzak, hirugarren gisa.
• Biltegiratzeko soluzio berrien ebaluazio tekniko eta ekonomikoa.
• Bateriak huts egitearen arrazoien post mortem analisia.

Horretarako, Bcare-k Javier Olarte aukeratu du CEO gisa. Olartek 30 urtetik gorako eskarmentua du energia biltegiratzearen arloan, eta, dioenez, aukera paregabea da hau Euskadiko energia biltegiratzeko industriaren balio-katea dinamizatzeko eta nabarmentzeko, baliabide aurreratuenak eta goi-mailako nazioarteko talde zientifiko bat enpresen zerbitzura jarrita. Horrek, nola ez, lehiakortasuna bultzatuko du, eta beste ekimen batzuen oinarria izango da.